Hindistanly milliarder Ambaniniň maşgalasy Aziýada iň baý maşgala boldy

«tmcars.info» web saýtynyň habar bermegine görä, Hindistanly milliarder Mukeş Ambaniniň maşgalasy Aziýanyň iň baý 20 maşgalasynyň sanawynda birinji orny eýeledi. Sanaw «Bloomberg» agentligi tarapyndan hödürlendi we oňa Hindistandan, Taýlanddan, Hytaýdan, Indoneziýadan, Malaýziýadan we beýleki ýurtlardan iň barly adamlar girdi.Hindistanda iň uly senagat konglomeratlarynyň biri bolan «Reliance Industries» şereketine eýeçilik edýän Ambaniniň maşgalasynyň maliýe işjeňligi 90,5 milliard dollar diýlip hasaplanýar. Ikinji orny 42,6 milliard dollar baýlyk bilen Tailanddan Çerawanont maşgalasy eýeleýär. Ol azyk harytlaryny öndüriji «Charoen Pokphand» kompaniýalar toparyna eýeçilik edýär we bütin Aziýa boýunça telekommunikasiýa işini alyp barýar. Reýtingde üçünji orny eýelän indoneziýaly bankir Hartononyň maşgalasynyň maýasy 42,2 milliard dollara barabar.Ambaniden başga-da, «Bloomberg» neşiriniň sanawyna Hindistandan ýene alty milliarderler maşgalasy girdi. Bu ýurtda milliarderleriň umumy baýlygy soňky 10 ýylda üç esse artyp, 905,6 milliard dollara ýetdi. Bu döwürde hindi milliarderleriniň sany iki esse artyp, 300-e golaýlady. Häzirki wagtda ýurtda maýasy 1 milliard dollardan gowrak bolan 108 maşgala kärhanasy resmi taýdan hasaba alnan. Bu kärhanalar Hindistanyň ykdysady ösüşini üpjün etmekde möhüm orun eýeledi we ýurduň ykdysadyýetiniň üýtgemegine uly täsir etdi. Çaklamalara görä, geljek on ýylda Hindistanda milliarderleriň sany artmagyny dowam eder.