Şu ýylyň dowamynda Hazar deňzi — Gara deňiz halkara ulag geçelgesi dörttaraplaýyn hökümetara şertnama gol çekiler
Şu ýylyň dowamynda Hazar deňzi — Gara deňiz halkara ulag geçelgesi dörttaraplaýyn hökümetara şertnama gol çekiler. Bu barada Türkmenistan gazetiniň şu günki – 25-nji iýulyndaky sanynda neşir edilen «Slowakiýada we Rumyniýada syýasy geňeşmeler geçirildi» atly makalada habar berildi.
Buharestde Türkmenistanyň hem Rumyniýanyň Daşary işler ministrlikleriniň arasynda guralan syýasy geňeşmeleriň dowamynda ikitaraplaýyn gün tertibiniň möhüm ugurlary, halkara we sebit meseleleri boýunça pikir alşyldy. Taraplar energetika, maglumat tehnologiýalary, suw hojalygy babatda hyzmatdaşlygyň uly geljeginiň bardygyna ünsi çekdiler.
A.Gurbanowyň Rumyniýanyň daşary işler ministri L.Odobesku, Ulag we infrastruktura ministrliginiň döwlet sekretary A.Fogiş, Milli bilim ministrliginiň döwlet sekretary G.Paraskiw, «Rumyniýa — Türkmenistan» parlamentara dostluk toparynyň başlygy K.Kolçar bilen geçiren gepleşiklerinde syýasy, ulag, bilim, parlament ugurly gatnaşyklaryň möhüm meseleleri ara alnyp maslahatlaşyldy. Taraplar ulag ulgamynda ikitaraplaýyn iş toparlarynyň alyp barýan işleriniň çäklerinde ozal gazanylan ylalaşyklaryň ýerine ýetirilişine ünsi çekip,
şu ýylyň dowamynda Buharestde Hazar deňzi — Gara deňiz halkara ulag geçelgesini döretmek hakynda dörttaraplaýyn hökümetara şertnama gol çekmäge taýýardyklaryny beýan etdiler.
Rumyniýanyň Milli bilim ministrliginiň döwlet sekretary bilen duşuşykda bolsa söhbetdeşler geljekde Türkmenistanyň ýokary okuw mekdepleriniň birinde rumyn dili hünärini açmak mümkinçiligini öwrenmek barada ylalaşdylar. Şeýle-de saparyň çäklerinde bu dostlukly ýurtda bilim alýan türkmen talyplary bilen duşuşyk geçirildi.