Bolgariýa ýewrony milli pul birligi hökmünde dolanyşyga girizer
Bolgariýanyň Halk ýygnagy (parlament) ýewronyň milli pul birligi hökmünde dolanyşyga girizilmegini tassyklaýan kanun kabul etdi. Bu barada «Zaman Türkmenistan» gazetiniň şu günki – 2024-nji ýylyň 16-njy awgustyndaky 33/1599 belgili sanynyň 4-nji sahypasynda çap edilen «Bolgariýa ýewro geçer» atly makalada habar berildi.
Täze kanun Bolgariýada ýewronyň dolanyşyga girizilmeginiň ýörelgelerini we kadalaryny tertibe salyp, ýewro geçişiň düzgünlerini kesgitleýär hem-de raýatlara täze walýuta uýgunlaşmaga wagt berjek geçiş döwrüni girizýär. Bolgariýada ýewronyň dolanyşyga goýberiljek wagty heniz kesgitlenilmedi. Onuň wagty Ýewropa Bileleşiginiň Geňeşi tarapyndan kesgitlenmeli diýlip, habarda bellenilýär.
Ýewronyň bolgar lewi bilen birlikde dolanyşykda bolmagy ýeke-täk Ýewropa pulunyň girizilmeginden soň bir aýa çenli dowam eder. Geçiş döwri gutarandan soň, bolgar puly dolanyşykdan doly aýrylar. Harytlaryň we hyzmatlaryň bahalary bolsa, ýylyň dowamynda iki pul birliginde-de görkeziler.
Bolgariýanyň Halk banky kanuna laýyklykda, raýatlaryň kagyz pullaryny we şaýylyklaryny resmi nyrhda çäklendirilmedik mukdarda, wagty çäklendirmezden we hyzmat üçin töleg almazdan ýewro bilen çalyşmaga borçly edildi.