«Galkynan ykbal» hususy kärhanasy önümlerini eksport etmegi meýilleşdirýär

«Galkynan ykbal» hususy kärhanasy ýakyn wagtlarda öz önümlerini eksport etmegi meýilleşdirýär. Bu barada «Türkmenistan» gazetiniň habarçysy Akmyrat Nuralyýewiň «Türkmenistan» gazetiniň şu günki – 2024-nji ýylyň 3-nji iýulyndaky sanynda çap edilen «Islegli gurluşyk harytlary» atly makalasynda habar berildi.

         «Galkynan ykbal» hususy kärhanasy 2012-nji ýyldan bäri kafel ýelimlerini öndürip gelýär. Önüm 3,5 kilogramdan 20 kilograma çenli bolan haltalara gaplanýar we söwda nokatlaryna ugradylýar. Kärhananyň 2022-nji ýylda boýag önümleriniň önümçiligini ýola goýandygyny aýtmak gerek. Boýaglar «ELTEKS-akrilik», «Ganat» haryt nyşany bilen satuwa çykarylýar. Olar içki we daşky diwarlar üçin niýetlenilendir. Boýaglar reňkini ýitirmeýänligi bilen tapawutlanýar. Suw esasly boýaglar dürli ölçegdäki plastik gaplara gaplanýar. Bu müşderiler üçin juda amatlydyr. Ýokary hilli kafel ýelimleri «ERKfix» haryt nyşany bilen bellidir.

         «Galkynan ykbal» hususy kärhanasynyň önümçiligi üçin dünýäniň öňdebaryjy enjamlary ornaşdyrylandyr. Bu bolsa ýokary hilli önümleri öndürmäge mümkinçilik berýär. Şonuň üçinem gürrüňi edilýän önümlere isleg barha artýar. Gurluşyk bilen meşgullanýan hususy kärhanalardyr hojalyk jemgyýetleri kafel ýelimlerini we boýaglary lomaý satyn alýarlar. Ýakyn wagtlarda bolsa bu kärhana öz önümlerini eksport etmegi hem meýilleşdirýär.