Göreşip bilýäne ömür gutarmaz
Ýyllar geçdi,
ýonup-ýonup igleden,
Labyryny aňsat-aňsat sowmady.
Kaýyllyga gelen karar nireden?!
Bu ykbalyň maňa beren sowgady.
Gowy zat, öňünden bilmänligimem,
Bagtyna ýüregiň çydam edişin?!
Emrimi elenmä bermänligimem,
Özüm diňläp,
özüm diňdim endişin.
Ýyladan günlerden ýylgyryp gaýdýan,
Gursun oýnun,
gaýduwsyzlar utulmaz.
Bir zada gözümiň ýetenni aýdýan,
Göreşip bilýäne ömür gutarmaz.
Mydam göz öňümde boldy merdanlar,
Saklandyrlar jan ýanynda çydamyn.
Başyny egendir ala meýdanlar,
Geýdirendir başlaryna jygasyn.
Ýeňledim
hem ýeňdim bilbil deý saýrap,
Hesretim,
hezzetim,
her demim dessan.
Egisdim derdimi şygyrda gaýnap,
Menzile ýetermiň bolmasaň lerzan?!
Egni deňläsim geldi
Geljegiňe baksaň, düýnüňi dörmän,
Asmanyň ýalkymyn öpmersiň örmän.
Özüňden ökdäni bolarmy görmän,
Egnine egnimi deňläsim geldi.
Asuda günlere gymmatyň gerek,
Ojagyň ýumşuna hyzmatyň gerek.
Ogullar başgadyr tutanda derek,
Gujurla, gurbatla höwäsim geldi.
Eşretli eýýamyň güzerne gonuň,
Bezemen begresdir saglaryň-soluň.
Azabyn, agramyn agtarýan ýoluň,
Ahyryn aňsamam, egläsim geldi.
Aýgydy, aňyrsy öwrümdemikä,
Dik başa egilmek öňümdemikä.
Ezizler,
ejizlik özümdemikä,
Neçündir o halla degmäsim geldi.
Guzular gidende garradyň, dardyň,
Hoşlaşan guşlaryň salgymna zardyň.
Aslynda, saýraýan bir dilli tardyň,
Elenip, egilip, eňräsim geldi.
Ýangyny özüňki, ýakymly ha:lam,
Ýüregňe ýol salyp barýandyr ba:ram.
Şonda-da, şatlygna men hyrydaram,
Tug ýaly başymy egmäsim geldi.
Men
Ýer döräp Zeminde asyrlap ýaşan
Ilim bar, bilseňiz, men diýen sözde.
Agramly ýyllaryň azabyn daşan
Silim bar, bilseňiz, men diýen sözde.
Ýaýylyp ýatandyr giňiş Garagum,
Keşdelidir geriş-geriş çägeler.
Sürä golaý gelseň, gözleriňi ýum,
Ýaňy dogan guzujyklar mäleýär.
Depeler gümmezli öýlermiz ýaly,
Eştse bimar eder aýdymly çeşmäm.
Maýsaly bossanlar köýnegim ýaly,
Nämedigni aýdar olar gelişmäň.
Giň ülkämiň jahany bar,
jähegi,
Ýoluň düşse, dostum,
sowulman ötme.
Şygyrly şelpäniň bardyr äheňi,
Men diýen sözümi Gözeldir öýtme.
