Türkmenistanyň wekiliýeti Owganystanyň Hyrat welaýatynda saparda boldy

Düýn – 2024-nji ýylyň 22-nji awgustynda Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredowyň ýolbaşçylygyndaky wekiliýet Owganystanyň Hyrat welaýatynda saparda boldy. Hyrat welaýatynda Türkmenistanyň daşary işler ministri Raşid Meredow bilen Owganystanyň daşary işler ministri Amir Han Muttaki sebitdäki gaz geçiriji, demirýol we infrastruktura taslamalary boýunça pikir alyşdylar. Bu barada «Ata Watan Türkmenistan» halkara žurnaly Owganystanyň daşary syýasat edarasynyň täzeliklerine salgylanyp habar berdi.

Turgundi etrabynda taraplar Türkmenistan-Owganystan-Pakistan-Hindistan gaz geçirijisi taslamasynyň owgan bölegindäki gurluşygyna girişmek, täze demirýol we elektrik geçiriji infrastruktura taslamalary gurluşygy bilen baglanyşykly meseleleri ara alyp maslahatlaşdylar.

Owganystanyň daşary işler ministri Amir Han Muttakiniň ýolbaşçylygyndaky wekiliýetiň düzüminde ýurduň dag magdan, nebit, aragatnaşyk we maglumat tehnologiýalary ýaly pudaklaryň ýolbaşçylary hem bar.

Muttaki özüniň türkmen kärdeşine Owganystanyň TOPH gaz geçirijisi gurluşygy boýunça taýýarlyk işlerini tamamlap, gurluşyga girişmäge taýýardyklaryny belläp geçdi.

Türkmenistanyň daşary işler ministri Raşid Meredow hem öz gezeginde Türkmenistanyň Owganystanda täze polat ýoluň we demirýol menziliniň gurluşygyny çaltlandyrmaga taýýardygyny belledi.

Şeýle hem taraplar Nur-ul Jihad podstansiýasynyň elektrik energiýasyny geçirmek babatda möhüm ähmiýete eýedigini belläp, munuň hem ýakyn wagtda tamamlanjakdygyny belläp geçdiler.