Amangeldi Babaýew / Göresim gelýär (Aýdyşyk goşgy)

Amangeldi Babaýew:
Kän zat hakda gürrüň beresim gelýär,
Men seni şeýle bir göresim gelýär.
Senli günleň bagty başgaça bolýar,
Men seni şeýle bir göresim gelýär.

Sewinç Muratgeldiýewa:
Gaýgy-gamlar gurşap alsa başymy,
Sen gorardyň mydam meniň daşymy,
Saklap bilmen indi gözde ýaşymy,
Men seni şeýle bir göresim gelýär.

Amangeldi Babaýew:
Ýaşlygymda meniň arzuwym bolduň,
Ýazda gülläp, sensiz saralyp soldum,
Göýä sensizlikde men demsiz galdym,
Men seni şeýle bir göresim gelýär.

Sewinç Muratgeldiýewa:
Yz goýupdyň ýüregimde ilki sen,
Ynan, janym, seni şeýle söýýän men,
Indi sensiz alyp bilmerin men dem,
Men seni şeýle bir göresim gelýär.

Amangeldi Babaýew:
Bizi bagta eltdi söýginiň güýji,
Duşuşyk süýji zat, aýralyk ajy,
Bu gün oýa batyp, ýatlap geçmişi,
Men seni şeýle bir göresim gelýär.

Sewinç Muratgeldiýewa:
Kalbymda päk söygiň oduny ýakdyň,
Sen maňa mydama mahirli bakdyň,
Şeydip ýüregimde söýgi döretdiň,
Men seni şeýle bir göresim gelýär.

Amangeldi Babaýew:
Bir günlükmi, ömürlikmi, bilmedim.
Wagt geçdi, ýeňlemedim, gülmedim,
Seni ýatlap, gursagymy diňledim,
Men seni şeýle bir göresim gelýär.

Sewinç Muratgeldiýewa:
Soradym asmandan hem-de zeminden,
Gözläp geçdim, ençe günleň deňinden,
Bagt gelse bolýar bulaň soňundan,
Men seni şeýle bir göresim gelýär.

Amangeldi Babaýew:
Käte ejizlikden ýürek aglaýar,
Käte ýekelikde bagrym daglaýan,
Halys ýürek aýralyga dözmeýär,
Men seni şeýle bir göresim gelýär.

Sewinç Muratgeldiýewa:
Umman ýaly söýgi gördüm gözüňde,
Çyn söýgiňi duýdum her bir sözüňde,
Goýup gitdiň meni, janym, yzyňda,
Men seni şeýle bir göresim gelýär.

Amangeldi Babaýew:
Geçdim sensiz ençe ýoly, alysy,
Ýöne günleň gussa boldy barysy,
Sen ekeniň durmuşymyň manysy,
Men seni şeýle bir göresim gelýär.

Sewinç Muratgeldiýewa:
Umytly bakýaryn günde ýoluňa,
Seredýärin, janym, beren gülüňe,
Göz aylap ýene-de sagy soluma,
Men seni şeýle bir göresim gelýär.

Amangeldi Babaýew:
Ýüregim gürleýär, dillerim dymyp,
Ýüregimiň zaryn şygyra salyp,
Amangeldi ýatlar, gözün ýaş alyp,
Men seni şeýle bir göresim gelýär.

Sewinç Muratgeldiýewa:
Söy meni, gitme sen meniň ýanymdan,
Sen diýip geçerin şirin janymdan,
Meniň üçin gadyrlysyň baryndan,
Men seni şeýle bir göresim gelýär