Ogultäç Oraztaganowa / Durmuşa (goşgy)

Derdime Eýämden em gelip durka,

Uýalýan – şükürlem kem gelip durka,

Süýji janym bilen dem gelip durka,

Hergiz ýürekdäki yşkymy alma!

Ýylgyrmasa, ondan meňiz bolarmy?

Heý ajy däneden maňyz bolarmy?

Kenarsyz deňizden deňiz bolarmy?

Hergiz ýürekdäki yşkymy alma!

Neçüýn mahal-mahal bu dünýä darka?

Yza çekilmek bar, ýürekler zarka,

Möwlana söýdügi hazynam barka?

Hergiz ýürekdäki yşkymy alma!

Düýşe girip bir mübärek keşp bilen,

Dünýäm, meni maýyl edýäň müşk bilen,

Öz dünýämi bezäp ýörkäm yşk bilen,

Hergiz ýürekdäki yşkymy alma!