Aýjahan Annabaýewa / Men Saňa söýgimi beýan edýärin (goşgy)
Men Saňa söýgimi beýan edýärin
Gün doganda göz gamaşar keşbiňe.
Aý doganda aşyk bolýar görküňe.
Men saňa söýgimi beýan edýärin
Ýüregim goýmansoň, meni erkime.
Başymy aýlamaz uçut gaýalaň,
Kän zadyň bar aýlanara baş munda.
Men saňa söýgimi beýan edýärin,
Ýazmamda-da, zyýada sen aslynda.
Ýürek – daglaryňa seýil küýseýär.
Ruhum seýran istär jümle jahana.
Men saňa söýgimi beýan edýärin,
Bu däl ahyr goşgym üçin bahana.
Çeşme-çaýyň, jülge-zawyň yşgynda,
Men bir kalby telwas, aşyk bendiwan.
Men saňa söýgimi beýan edýärin.
Aýtjaklarym söze sygma:n endigan…
26.09.2023ý.
