Ogultäç Oraztaganowa / Dostlarym bar, wah, şolara döneýin! (goşgy)

Dost ýoluna güller düşelip durar,

Özem saňa sessiz düşünip durar,

Gök asmany ýere düşürip durar,

Dostlarym bar, wah, şolara döneýin!

Durmuş bolsun, munda, goý, bizi – synan!

Beg bolarmyş, eziz dostuny sylan,

Hassa halym gelip, halymy soran,

Dostlarym bar, men şolara döneýin!

Biri gara gözüm, biri ýüregim,

Biri Taňryň her gününde geregim,

Ýanlaryna alyp barar küregim,

Dostlarym bar, wah, şolara döneýin!

Çaý başynda göwni çoh çaglap boljak,

Bileje gülüşip hem aglap boljak,

Başa bir iş düşende bil baglap boljak,

Dostlarym bar, men şolara döneýin!

Mähir söýgi… däldir hergiz gutarýan,

Dostlar kändir öýe rysgal getirýän,

Kyn günümde goltugymdan göterýän,

Dostlarym bar, wah, şolara döneýin!

Dostlarym bar, men şolara döneýin!

25.07.2024.