Ogultäç Oraztaganowa / Mertligi söýdüm (goşgy)

Göwnümiň tarlary üzüldi gitdi,

Aýdyp ýetişmänkäm ýekeje aýdym.

Özümde kän zady söýüp bilmedim,

Ynsanlarda bolsa mertligi söýdüm.

Garkyldaşyp gazlar uçup geçende,

Boýnum däl-de, umytlarym üzüldi,

Döküp ýetişmedik ýaşy biçäräň,

Meniň elwan ýaňagymda düzüldi.

Kölgesinde hatar-hatar baglaryň,

Öýkelerim uka gitdi, düýş gördi.

Yşkym näzlerimi çekip ýörmegi,

Wah, özüne ullakan bir iş gördi.

Şo-ol agaçlar başyn egen çagynda,

Mähir gördüm – ynsanlarda duşmadyk,

Eýse nätjek, diýenimiz bolmasa,

Ahmyr bilen hyrçymyzy dişledik.

…Göwnümiň tarlary üzüldi gitdi,

Aýdyp ýetişmänkäm ýekeje aýdym.

Özümde kän zady söýüp bilmedim,

Adamlarda bolsa mertligi söýdüm.

14.05.2024.